想同大家分享一下今日返工嘅一件事。
今日係平安夜，麵包店只係開7至12點。今日比平時忙碌，因為麵包店聽日唔開，大家都趕喺朝早買定兩日嘅早餐。去到大概11點左右係最忙碌嘅時間，一個經常幫襯嘅伯伯又出現左。每次畀錢嘅時候，伯伯隻手都會狂震，然後張信用卡會跌左落張枱，係每一次，所以我好記得佢。佢今日買左好多野，有汽水、麵包、餐巾、水果等等，似係為家人準備聖誕大餐。所以購買嘅金額都比平時高，最後總共買左500幾蚊野。到比錢嘅時候發現因為金額太高無辦法用掃卡支付，一定要入密碼。
伯伯一面惆悵，話佢唔記得自己嘅信用卡密碼。呢個時候，條隊已經排到去舖頭嘅盡頭，大家都望下前面發生咩事。我嘗試畀伯伯分兩次畀錢，睇下金額少d會唔會可以唔使入密碼，點知都係唔得。
然後隊後面一個男人突然衝上黎幫伯伯畀左錢，然後講左句「係聖誕老人送畀你嘅禮物。」伯伯非常感激，問個男人點樣畀返錢佢，個男人堅持係話係聖誕老人送嘅禮物。然後伯伯就帶住笑容離開左麵包店。
大地之友們，聖誕快樂🎄❤️
#siumaiismybaby #merrychristmas #久違了的全家福
Search